ചലോ ബാക്ക്.. ഈ സംഭവം നടക്കുന്നത് .....ഉം ...(എന്നാണെന്ന് മറന്ന് പോയി.. അമ്മച്ചിയാണേ സത്യം ... സ്വാറി ഫോര് ദാറ്റ്) എന്തായാലും നോം ബാംഗ്ലൂരില് നിന്നും അവധിക്ക് നാട്ടില് വന്നപ്പോളാണ്.. (ഹേ ബാംഗ്ലൂരില് ചുമ്മാ പഠിക്കാന് ആണെന്ന് പറഞ്ഞ് പോയതാ..) ഈ പുറത്ത് നിന്നും ആരു തിരിച്ചു നാട്ടില് വന്നാലും നാട്ടുകാര് പറയും " അയ്യോ.. നീ അങ്ങ് മെലിഞ്ഞു പോയല്ലോടാ മോനെ.." എന്റെ നാട്ടുകാരും ഏപ്പോഴും ഇത് തന്നെ പറഞ്ഞു കൊണ്ടിരുന്നു.. കേള്ക്കുമ്പോള് ദേഷ്യം വരുമെങ്കിലും ഇത് കൊണ്ട് ഒരു ഗുണമുണ്ട്..അതായത് നമുക്ക് എവിടെ ചെന്നാലും നല്ല ഫുഡ് ഇഷ്ടം പോലെ സാപ്പിടാം...! അത് കൊണ്ട് വീട്ടിലും നമുക്ക് നല്ല വരവേല്പ്പ് ആണ്. ഈ സിനിമേല് കാണുന്നത് പോലെ 'ചിക്കന് വേണോ, മട്ടണ് വേണോ' എന്ന സ്റ്റൈല് വരവേല്പ്പ്...!
ദങ്ങനെ നോം ആ അവധിക്ക് ചിക്കന്, താറാവ്, മട്ടണ്, ബീഫ് എന്നീ വരവേല്പ്പ് സ്പെഷ്യല് സാപ്പിട്ട് ബോര് ആയപ്പോള് നോം മോംസിനോട് പറഞ്ഞു, " മോംസ്, എനിക്ക് ആ സ്പെഷ്യല് വാളമീന് കഴിക്കാന് ഒരു ആഗ്രഹം.. ( ഈ വാളമീന്റെ തൊലി ഉപയോഗിച്ച് മോംസ് ഒരു സ്പെഷ്യല് ഡിഷ് ഉണ്ടാക്കാറുണ്ട്..എന്റെ മെയിന് എയിം അത് എങ്ങനെയെങ്കിലും സാപ്പിടുക എന്നതാണ്. അത് മോംസിനും അറിയാം.)
ഈ ദുരുദ്ദേശം മനസിലായത് കൊണ്ട് മോംസ് പറഞ്ഞു, "ഞമ്മക്ക് എന്നാല് മാര്ക്കെറ്റിലേക്ക് ഒന്നിച്ചു പോകാം, മകനേ.."
മാര്ക്കെറ്റിലേക്ക് പോകുന്ന കാര്യം ഓര്ത്തപ്പോള് തന്നെ ജന്മനാ ഉള്ള മടി പോകാന് പെര്മിഷന് തന്നില്ല. ഷര്ട്ട് ഇല്ല, പാന്റ് തേച്ചില്ല എന്നൊക്കെ പറഞ്ഞ് നോക്കിയങ്കിലും അതൊന്നും ഏറ്റില്ല.. പിന്നെ ആവശ്യം എന്റെയാണല്ലോ.. അതൊകൊണ്ട് നോം തീരെ അലക്കാത്ത ഒരു ജീന്സും, എവിടെയോ കിടന്ന ഷര്ട്ടും സംഘടിപ്പിച്ച്, ഒരു വിധത്തില് ഇറങ്ങി.. പിന്നെ ബാലന്സ് ഇല്ലാത്ത ആ ശിലായുഗ കാലത്തിലെ മൊബൈലും എടുത്തു. (ഒരു വഴിക്ക് പോകുവാണല്ലോ, വല്ല പെണ്പിള്ളേരും കണ്ടാല് - കയ്യില് ഒരു മൊബൈല് എങ്കിലും ഇല്ലെങ്കില് - എന്ന ചിന്ത എന്റെ മനസിനെ വേട്ടയാടി..)
അങ്ങനെ നോം മാര്ക്കെറ്റില് എത്തി. ( ഇനി ലൈവ് സംപ്രേഷണം)
മീന്കാരി ചേച്ചിയുടെ അടുത്ത് ഞാനും മോംസ് ചെന്ന് മീന് വാങ്ങുന്നു..
മീന്സ് : " ചേച്ചി നില്ക്ക്, ഞാന് ഇപ്പോം തന്നെ ഈ വാളയുടെ തൊലി ഉരിച്ചു കളഞ്ഞിട്ടു ഇത് പായ്ക്ക് ചെയ്യാം.."
( എന്റെ പൊന്നെ, ആ തൊലി കിട്ടിയിട്ട് വേണം ഇന്ന് എനിക്ക് സ്പെഷ്യല് വാള ഡിഷ് കഴിക്കാന്..! അത് ഈ മീന്സ് ഉണ്ടോ അറിയുന്നു...? )
എന്റെ ഈ അവസ്ഥ മനസ്സിലാക്കി മോംസ് പെട്ടെന്ന് മീന്സിനോട് പറഞ്ഞ്, " ഏയ് അത് സാരമില്ല, അത് ഞാന് വീട്ടില് എത്തിയിട്ട് കളഞ്ഞോളാം, ഞങ്ങള്ക്ക് വേഗം പോണം. "
മീന്സ്: "ഏയ്, ഇതിപ്പോള് തന്നെ ഞാന് റെഡി ആക്കി തരാം. ഒരഞ്ചു മിനിറ്റ് വെയിറ്റ് ചെയ്താല് മതി."
ഈ തള്ള, - സ്വാറി - മീന്സ് അത് കളഞ്ഞേ അടങ്ങു എന്ന വാശിയിലാണെന്നു തോന്നുന്നു.. എങ്ങനെയോ ഞാന് മോംസിനെ സിഗ്നല് കാണിച്ച് ആ മീന്കാരിയുടെ കറുത്ത കൈകളില് നിന്നും എന്റെ വാളയുടെ തൊലി രക്ഷിക്കാന് ഞാന് മോംസിനോട് പറഞ്ഞു..
പിന്നെ മോംസ് ഒന്നും നോക്കിയില്ല, ഒരു ഡയലോഗ് അങ്ങട് കാച്ചി. അതില് മീന്കാരി മാത്രമല്ല ഈ നോം വരെ വീണു പോയി..
മോംസ് പറഞ്ഞത് ഇങ്ങനെയാണ്. "അതേയ്, ഞങ്ങളുടെ വീട്ടില് ഒരു പട്ടിയുണ്ട്.. അതിന് ഇത് ഭയങ്കര ഇഷ്ടമാണ്. ഇത് കൊടുത്താല് പിന്നെ അതിന് വേറെ ഒന്നും വേണ്ട...!"
ഇത് കേട്ട് നോം നല്ല രീതിയില് വാ പൊളിച്ച് നിന്ന് പോയി. ( മോംസ് സ്വന്തം മകനെ ഒരു പട്ടിയോട് ഉപമിക്കുമെന്ന് നോം ഒരിക്കലും ചിന്തിച്ചില്ല)
മീന്സ്: ശരിയാ ചേച്ചി, ചില പട്ടികള്ക്ക് ഇത് കൊടുത്താല് പിന്നെ വേറെ ഒന്നും വേണ്ട...!" ( അത് ചിലപ്പോള് അവര് അവരുടെ ഭര്ത്താവിനെ ആയിരിക്കും ഉദ്ദേശിച്ചത്...! പാവം മനുഷ്യന്..)
ഏതായാലും മോംസ് ആ ഡയലോഗ് അടിച്ചത് കൊണ്ട് നമ്മുടെ വാളയുടെ തൊലി സേവ് ആയി..
തിരിച്ച് വീട്ടിലെത്തിയിട്ട് പിന്നെ നോം ഒന്നും പറഞ്ഞില്ല..( പട്ടി ചന്തക്ക് പോയത് പോലെ എന്ന് കേട്ടിട്ടുണ്ടല്ലോ, ഇത് ഏതാണ്ട് അതിനെ അടുത്ത് വരെ എത്തി എന്ന് തന്നെ പറയാം.)
പിന്നെ ഊണിന് നമ്മുടെ സ്പെഷ്യല് ഡിഷ് എത്തിയപ്പോള് നോമിന്റെ സങ്കടം എല്ലാം പമ്പ കടന്നു. അത് ഞാന് നല്ല രുചിയോട് സാപ്പിട്ട് തുടങ്ങിയപ്പോള് നമ്മുടെ ഒറിജിനല് പട്ടി - ബ്ലാക്കി, കൂട്ടില് കിടന്നു കുരക്കാന് തുടങ്ങി. കുര അല്ല, അത് നല്ല ചീത്ത വിളിയാണെന്ന് എനിക്ക് നല്ല ബോധ്യം വന്നു. അവന് കുരച്ചു കൊണ്ട് പറഞ്ഞത് ഇങ്ങനെ ആയിരുന്നിരിക്കണം.
" എടാ കോപ്പേ, എനിക്ക് കിട്ടേണ്ട ഫുഡ് ആണല്ലോടാ നീ അടിച്ച മാറ്റിയത്..അതും എന്റെ പേരില് വാങ്ങിയിട്ട്...! നിന്റെ പേരില് ഞാന് പട്ടികളുടെ കണ്സ്യൂമര് കോര്ട്ടില് കേസ് കൊടുക്കുമെടാ....:D
( ചന്ത ലൈവ് സംപ്രേഷണം അവസാനിക്കുന്നു. ഇനി കമെന്റ് പോസ്റ്റ് ചെയ്യുകയല്ലേ നല്ലത്..?) :D :D
